តើអឺរ៉ុបសុខចិត្តលះបង់អ្វីខ្លះ ដើម្បីជៀសផុតពីពន្ធរបស់លោក ត្រាំ? អាថ៌កំបាំងនៃកិច្ចព្រមព្រៀង Arctic និង Golden Dome

ទីក្រុងដាវ៉ូស ប្រទេសស្វីស ថ្ងៃទី២១ ខែមករា ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃពុធថា កិច្ចពិភាក្សាជាមួយអគ្គលេខាធិការអង្គការណាតូ (NATO) លោក Mark Rutte បានបង្កើតឱ្យមាន «ក្របខ័ណ្ឌនៃកិច្ចព្រមព្រៀងនាពេលអនាគត» ពាក់ព័ន្ធនឹងកោះហ្គ្រីនឡែន (Greenland) និងតំបន់អាកទិកទាំងមូល ព្រមទាំងបានប្រកាសថា លោកនឹងមិនបន្តអនុវត្តការដំឡើងពន្ធលើប្រទេសអឺរ៉ុបចំនួន ៨ ដែលគ្រោងនឹងចូលជាធរមាននៅថ្ងៃទី១ ខែកុម្ភៈនោះទេ។
នៅក្នុងការបង្ហោះលើបណ្តាញសង្គម Truth Social របស់លោក លោក ត្រាំ បានមានប្រសាសន៍ថា ក្របខ័ណ្ឌនេះបានលេចចេញឡើងបន្ទាប់ពី «ជំនួបដ៏មានផ្លែផ្កា» ជាមួយលោក Rutte ហើយវានឹងក្លាយជា «កិច្ចព្រមព្រៀងដ៏អស្ចារ្យមួយសម្រាប់សហរដ្ឋអាមេរិក និងបណ្តាប្រទេសណាតូទាំងអស់» ប្រសិនបើវាត្រូវបានសម្រេចជាស្ថាពរ។ លោក ត្រាំ បានសរសេរថា៖ «ផ្អែកលើការយោគយល់គ្នានេះ ខ្ញុំនឹងមិនដាក់ពន្ធដែលបានគ្រោងទុកឱ្យចូលជាធរមាននៅថ្ងៃទី១ ខែកុម្ភៈនោះទេ» ដោយលោកមិនបានផ្តល់ព័ត៌មានលម្អិតអំពីលក្ខខណ្ឌនៃសំណើកិច្ចព្រមព្រៀងនោះឡើយ។
លោក ត្រាំ ក៏បានឱ្យដឹងផងដែរថា ការពិភាក្សាបន្ថែមទៀតកំពុងដំណើរការលើគម្រោង «The Golden Dome» ដែលជាប្រព័ន្ធការពារមីស៊ីលច្រើនស្រទាប់សម្រាប់សហរដ្ឋអាមេរិក ខណៈវាមានការពាក់ព័ន្ធនឹងកោះហ្គ្រីនឡែន ដោយលោកបានបន្ថែមថា ព័ត៌មានបន្ថែមនឹងត្រូវបានផ្សព្វផ្សាយនៅពេលកិច្ចចរចាមានវឌ្ឍនភាព។ លោកបានបញ្ជាក់ថា អនុប្រធានាធិបតីអាមេរិក លោក JD Vance, រដ្ឋមន្ត្រីការបរទេស លោក Marco Rubio និងបេសកជនពិសេស លោក Steve Witkoff នឹងដឹកនាំការចរចា និងរាយការណ៍ផ្ទាល់មកកាន់រូបលោក។
គួរបញ្ជាក់ថា មុនពេលធ្វើដំណើរទៅកាន់វេទិកាសេដ្ឋកិច្ចពិភពលោក (World Economic Forum) ក្នុងទីក្រុងដាវ៉ូស លោក ត្រាំ ធ្លាប់បានគំរាមកំហែងដំឡើងពន្ធថ្មីលើប្រទេសអឺរ៉ុបចំនួន ៨ រួមមាន ប្រទេសដាណឺម៉ាក និងប្រទេសសមាជិកណាតូសំខាន់ៗដូចជា ចក្រភពអង់គ្លេស បារាំង និងអាល្លឺម៉ង់។ នៅពេលនោះ លោក ត្រាំ បាននិយាយថា វិធានការដំឡើងពន្ធនេះនឹងនៅតែបន្តអនុវត្ត រហូតទាល់តែមានកិច្ចព្រមព្រៀងសម្រេចបានសម្រាប់ការ «ទិញយកទាំងស្រុង» នូវកោះហ្គ្រីនឡែន។