បន្ទាប់ពីបានដកខ្លួនចេញពីកិច្ចព្រមព្រៀងអាកាសធាតុទីក្រុងប៉ារីសជាលើកទីពីរ កាលពីឆ្នាំមុន និងបានបដិសេធមិនបញ្ជូនប្រតិភូទៅចូលរួមសន្និសីទអង្គការសហប្រជាជាតិស្តីពីការផ្លាស់ប្តូរអាកាសធាតុលើកទី៣០ (COP30) នៅប្រទេសប្រេស៊ីល រដ្ឋបាលសហរដ្ឋអាមេរិកបានប្រកាសកាលពីដើមខែនេះនូវបំណងចង់ចាកចេញពីអនុសញ្ញាក្របខ័ណ្ឌអង្គការសហប្រជាជាតិស្តីពីការផ្លាស់ប្តូរអាកាសធាតុ ដែលជាការវាយប្រហារមួយទៀតដល់អភិបាលកិច្ចអាកាសធាតុពិភពលោក។ ផ្ទុយទៅវិញ ទោះបីជាមានឧបសគ្គជាសកលក៏ដោយ ប្រទេសចិនបានពន្លឿនការផ្លាស់ប្តូរទៅរកថាមពលបៃតង និងកាបូនទាប ដោយបានបង្កើតប្រព័ន្ធគោលនយោបាយពេញលេញបំផុតរបស់ពិភពលោកក្នុងការកាត់បន្ថយការបំភាយឧស្ម័នកាបូន និងការកសាងប្រព័ន្ធថាមពលកែច្នៃឡើងវិញដ៏ធំបំផុតក្នុងលោក។ ក្នុងនាមជាអ្នកដឹកនាំពិភពលោកផ្នែកថាមពលកែច្នៃឡើងវិញ សមត្ថភាពផលិតកម្មបៃតងរបស់ចិន មិនត្រឹមតែជួយដល់ការផ្គត់ផ្គង់ថាមពលផ្ទាល់ខ្លួនប៉ុណ្ណោះទេ ប៉ុន្តែថែមទាំងបង្កើតឱកាសយ៉ាងទូលំទូលាយសម្រាប់បណ្តាប្រទេសនៅ "តំបន់ខាងត្បូង" (Global South) ដើម្បីសម្រេចបាននូវការអភិវឌ្ឍន៍បែបកាបូនទាប និងលោតផ្លោះ ដែលជួយកសាងពិភពលោកដ៏ស្អាត និងស្រស់បំព្រង។ ជំហានឈានទៅមុខយ៉ាងត្រចះត្រចង់ នៅក្នុងប្រទេសចិន ដែលជាអ្នកប្រើប្រាស់អគ្គិសនីធំបំផុតរបស់ពិភពលោក ១ ក្នុងចំណោម ៣ គីឡូវ៉ាត់ម៉ោងនៃអគ្គិសនីបានមកពីប្រភពថាមពលបៃតង។ យោងតាមរដ្ឋបាលថាមពលជាតិ (NEA) ចិនបានជាប់ចំណាត់ថ្នាក់លេខ១ ក្នុងពិភពលោកលើសមត្ថភាពដំឡើងថាមពលខ្យល់ក្នុងរយៈពេល ១៥ ឆ្នាំជាប់ៗគ្នា។ គិតត្រឹមខែវិច្ឆិកា ឆ្នាំ២០២៥ សមត្ថភាពដំឡើងសរុបបានកើនលើស ៦០០ លានគីឡូវ៉ាត់ (kW) ដែលលើសពីប្រទេសដទៃទៀតឆ្ងាយណាស់។ តំបន់ភាគពាយព្យនៃប្រទេសចិនដូចជា Qinghai, Xinjiang និង Ningxia បានប្រែក្លាយវាលខ្សាច់ដែលហួតហែងទៅជាឃ្លាំងថាមពលបៃតងតាមរយៈការអភិវឌ្ឍន៍ថាមពលពន្លឺព្រះអាទិត្យខ្នាតយក្ស។ ចំណែកឯខេត្តជាប់មាត់សមុទ្រដូចជា Guangdong, Jiangsu និង Shandong កំពុងពង្រីកចង្កោមថាមពលខ្យល់នៅតាមឆ្នេរដើម្បីឆ្លើយតបនឹងតម្រូវការអគ្គិសនីខ្ពស់។ បន្ថែមពីនេះ ចិនកំពុងនាំមុខលើបច្ចេកវិទ្យាចុងក្រោយបង្អស់ ដូចជាការផលិតប្រេងឥន្ធនៈអាកាសចរណ៍ប្រកបដោយនិរន្តរភាព (SAF) តាមរយៈការបំប្លែងឧស្ម័នកាបូនិច និងអ៊ីដ្រូសែនបៃតងទៅជាឥន្ធនៈរាវ ដែលជួយសម្រួលដល់វិស័យដឹកជញ្ជូនតាមផ្លូវអាកាស។ ការរួមចំណែកដែលគួរឱ្យសរសើរ សមិទ្ធផលបៃតងរបស់ចិនមិនត្រឹមតែបម្រើការក្នុងប្រទេសប៉ុណ្ណោះទេ ប៉ុន្តែបានសាយភាយទៅក្រៅប្រទេស។ ក្នុងចន្លោះឆ្នាំ ២០២១-២០២៥ ផលិតផលថាមពលខ្យល់ និងពន្លឺព្រះអាទិត្យដែលចិនបាននាំចេញ បានជួយកាត់បន្ថយការបំភាយឧស្ម័នកាបូនប្រហែល ៤,១ ពាន់លានតោននៅក្នុងប្រទេសដទៃទៀត។ លោក ថង មីងដាវីដ អនុប្រធានមជ្ឈមណ្ឌលសិក្សាចិន-អាស៊ាន នៃសាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា បានលើកឡើងថា ឧបករណ៍ថាមពលកែច្នៃឡើងវិញដែលផលិតដោយចិន បានជួយកាត់បន្ថយថ្លៃដើមបច្ចេកវិទ្យាពន្លឺព្រះអាទិត្យ ខ្យល់ និងអាគុយយ៉ាងខ្លាំងក្នុងរយៈពេលមួយទសវត្សរ៍កន្លងមកនេះ។ លោកបានបន្ថែមថា កិច្ចសហប្រតិបត្តិការនេះគាំទ្រដល់ការប្តេជ្ញាចិត្តរបស់អាស៊ានក្រោមគោលដៅអភិវឌ្ឍន៍ប្រកបដោយនិរន្តរភាពរបស់អង្គការសហប្រជាជាតិ (SDGs)។ ទស្សនាវដ្តីវិទ្យាសាស្ត្រអាមេរិក Science បានប្រសិទ្ធនាមការកើនឡើងនៃថាមពលកែច្នៃឡើងវិញថាជា "របកគំហើញប្រចាំឆ្នាំ ២០២៥" (2025 Breakthrough of the Year) ដោយកត់សម្គាល់ថាម៉ាស៊ីនឧស្សាហកម្មដ៏ខ្លាំងក្លារបស់ចិនគឺជាកម្លាំងរុញច្រានដ៏សំខាន់។ ចាប់តាំងពីឆ្នាំ ២០២២ ក្រុមហ៊ុនចិនបានសន្យាវិនិយោគប្រហែល ២០០ ពាន់លានដុល្លារអាមេរិកលើថាមពលស្អាតនៅក្រៅប្រទេស ដើម្បីជួយបង្រួមគម្លាតថវិកាដែលត្រូវការសម្រាប់កាត់បន្ថយការបំពុលអាកាសធាតុពិភពលោក។