វ៉ាស៊ីនតោន៖ ពិភពលោកហាក់ដកដង្ហើមធំបានបន្តិច បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសជាផ្លូវការកាលពីថ្ងៃអង្គារថា លោកបានយល់ព្រមផ្អាករាល់ការទម្លាក់គ្រាប់បែក និងការវាយប្រហារយោធាលើប្រទេសអ៊ីរ៉ង់ក្នុងរយៈពេល ២ សប្តាហ៍។ ការសម្រេចចិត្តដ៏គួរឱ្យភ្ញាក់ផ្អើលនេះត្រូវបានធ្វើឡើងតែប៉ុន្មានម៉ោងប៉ុណ្ណោះ មុនពេលឱសានវាទដែលលោកបានកំណត់ថា «អារ្យធម៌អ៊ីរ៉ង់ទាំងមូលនឹងត្រូវវិនាស» ចូលមកដល់។
តាមរយៈសារលើបណ្តាញសង្គម លោក ត្រាំ បានបញ្ជាក់ថា បទឈប់បាញ់បណ្តោះអាសន្ននេះ នឹងត្រូវអនុវត្តទៅបាន លុះត្រាតែភាគីអ៊ីរ៉ង់យល់ព្រមបើកច្រកសមុទ្រ Hormuz ជាបន្ទាន់ និងប្រកបដោយសុវត្ថិភាព។ លោកបានបន្ថែមថា មូលហេតុនៃការបន្ធូរបន្ថយភាពតានតឹងនេះ គឺដោយសារសហរដ្ឋអាមេរិកបានសម្រេចគោលដៅយោធារបស់ខ្លួនលើសពីការរំពឹងទុក ហើយបច្ចុប្បន្នកំពុងឈានទៅរកកិច្ចព្រមព្រៀងសន្តិភាពយូរអង្វែងមួយសម្រាប់តំបន់មជ្ឈិមបូព៌ា។ លោកក៏បានបង្ហើបថា អាមេរិកបានទទួលសំណើចំនួន ១០ ចំណុចពីទីក្រុងតេអេរ៉ង់ ដែលលោកជឿជាក់ថាជាមូលដ្ឋានគ្រឹះដែលអាចយកមកចរចាគ្នាបាន។
កិច្ចខិតខំប្រឹងប្រែងផ្នែកការទូតនេះ ត្រូវបានជំរុញយ៉ាងខ្លាំងក្លាដោយលោកនាយករដ្ឋមន្ត្រីប៉ាកីស្ថាន Shehbaz Sharif ដែលជាអ្នកនាំសារសន្តិភាពរវាងមហាអំណាចទាំងពីរ។ លោក Sharif បានអំពាវនាវឱ្យលោក ត្រាំ បន្តឱសានវាទបន្ថែម ២ សប្តាហ៍ និងបានស្នើឱ្យអ៊ីរ៉ង់បើកច្រកសមុទ្រ Hormuz វិញក្នុងរយៈពេលដូចគ្នា ដើម្បីបង្ហាញពីសុឆន្ទៈ។ កាលពីមុននេះ បន្តិច លោក ត្រាំ ធ្លាប់បានព្រមានយ៉ាងរន្ធត់ថា ស្ពាន និងរោងចក្រអគ្គិសនីទាំងអស់ក្នុងប្រទេសអ៊ីរ៉ង់ នឹងត្រូវបំផ្លាញឱ្យក្លាយជាផេះផង់ ប្រសិនបើគ្មានកិច្ចព្រមព្រៀងត្រូវបានសម្រេច។
នៅយប់មុនការប្រកាសនេះ កងកម្លាំងអាមេរិកត្រូវបានគេរាយការណ៍ថា បានវាយប្រហារលើគោលដៅយោធាមួយចំនួននៅកោះ Kharg របស់អ៊ីរ៉ង់ ប៉ុន្តែបានវៀរចម្លែកកន្លែងចម្រាញ់ប្រេង ដើម្បីទុកជាច្រកសម្រាប់ការនាំចេញ។ ទន្ទឹមនឹងនោះ ខ្សែរថភ្លើងជាច្រើនកន្លែងក្នុងប្រទេសអ៊ីរ៉ង់ ក៏ត្រូវបានគេរាយការណ៍ថាបានរងការទម្លាក់គ្រាប់បែកផងដែរ។
ជាការឆ្លើយតប រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានសន្យាថានឹងផ្តល់ការធ្វើដំណើរដោយសុវត្ថិភាពតាមច្រកសមុទ្រ Hormuz ក្រោមការសម្របសម្រួលពីកងកម្លាំងប្រដាប់អាវុធអ៊ីរ៉ង់ក្នុងកំឡុងពេល ២ សប្តាហ៍នេះ។ លោកបានបញ្ជាក់ថា អ៊ីរ៉ង់នឹងបញ្ឈប់ «ប្រតិបត្តិការការពារខ្លួន» ប្រសិនបើការវាយប្រហារពីអាមេរិកត្រូវបានបញ្ចប់។ លោក Araghchi ក៏បានបញ្ជាក់ជាថ្មីថា ការចរចានឹងត្រូវធ្វើឡើងនៅទីក្រុង Islamabad ប្រទេសប៉ាកីស្ថាន ដើម្បីពិភាក្សាលើព័ត៌មានលម្អិតនៃផែនការ ១០ ចំណុច ទោះបីជាលោកសង្កត់ធ្ងន់ថា បទឈប់បាញ់បណ្តោះអាសន្ននេះ មិនទាន់មានន័យថាជាការបញ្ចប់សង្គ្រាមជាស្ថាពរនៅឡើយក្តី៕