.png)
ប្រជាជាតិកម្ពុជាក្រោកឈរប្រឆាំងដាច់អហង្ការចំពោះសារព័ត៌មាន WSJ ដែលប្រើពាក្យប្រមាថកម្ពុជា
ក្នុងរយៈពេលប៉ុន្មានថ្ងៃចុងក្រោយនេះ រលកនៃកំហឹង និងការបដិសេធយ៉ាងខ្លាំងក្លាបានរីកសាយភាយពេញផ្ទៃប្រទេសកម្ពុជា បន្ទាប់ពីសារព័ត៌មានអន្តរជាតិ Wall Street Journal (WSJ) បានប្រើប្រាស់ពាក្យ "Scambodia" ក្នុងខ្លឹមសារផ្សព្វផ្សាយរបស់ខ្លួន។ ការប្រើប្រាស់ពាក្យនេះត្រូវបានប្រជាពលរដ្ឋកម្ពុជាគ្រប់មជ្ឈដ្ឋានចាត់ទុកថាជាការមួលបង្កាច់ និងជាការប្រមាថយ៉ាងធ្ងន់ធ្ងរដល់តម្លៃសេចក្តីថ្លៃថ្នូររបស់ជាតិ ដែលមានអរិយធម៌ខ្ពង់ខ្ពស់ និងចំណាស់រាប់ពាន់ឆ្នាំលើឆាកអន្តរជាតិ។
កម្ពុជាគឺជាទឹកដីនៃអរិយធម៌ដ៏រុងរឿង និងល្អឥតខ្ចោះបំផុតមួយក្នុងប្រវត្តិសាស្ត្រមនុស្សជាតិ ដែលពិភពលោកទាំងមូលបានស្គាល់ និងទទួលស្គាល់តាមរយៈមរតកវប្បធម៌ដ៏មហិមា ជាពិសេសគឺប្រាសាទអង្គរវត្ត ដែលជាអច្ឆរិយវត្ថុឯក។ ឈ្មោះថា "Cambodia" ឬ "កម្ពុជា" មិនមែនគ្រាន់តែជាឈ្មោះប្រទេសមួយនៅលើផែនទីនោះទេ ប៉ុន្តែវាគឺជាតំណាងនៃពូជសាសន៍ដែលមានចំណេះដឹង បញ្ញាញាណ និងសីលធម៌ខ្ពស់ខ្ពស់ដែលបានកសាងស្ថាបត្យកម្មដ៏អស្ចារ្យបំផុតសម្រាប់មនុស្សជាតិ។ ការដែលសារព័ត៌មានមួយកម្រិតពិភពលោក ហ៊ានយកឈ្មោះដ៏មានតម្លៃនេះមកលេងសើច ឬបំប្លែងក្នុងន័យអវិជ្ជមាន គឺជាការបង្ហាញពីកង្វះការទទួលខុសត្រូវ និងការមិនគោរពដល់អធិបតេយ្យភាពវប្បធម៌របស់ជាតិសាសន៍ដទៃ។
ឈានមកដល់យុគសម័យ ២.០ ដែលបច្ចេកវិទ្យាឌីជីថលកំពុងគ្របដណ្តប់លើពិភពលោក យើងមិនអាចបដិសេធបានឡើយថា គ្រប់បណ្តាប្រទេសទាំងអស់នៅលើសកលលោក សុទ្ធតែជួបប្រទះនូវគុណសម្បត្តិ និងគុណវិបត្តិដែលកើតចេញពីការវិវត្តនេះ។ បញ្ហាបទល្មើសបច្ចេកវិទ្យា ឬបញ្ហាសន្តិសុខអនឡាញ គឺជាបញ្ហាប្រឈមរួមដែលសូម្បីតែប្រទេសជឿនលឿនបំផុតក៏កំពុងដោះស្រាយដែរ ប៉ុន្តែវាមិនមែនជាលេសសម្រាប់យកមកវាយតម្លៃ ឬបិទស្លាកឱ្យជាតិសាសន៍មួយទាំងមូលដោយប្រើពាក្យប្រមាថបែបនេះឡើយ។ ការបំភ្លៃការពិតដោយយកបញ្ហាមួយផ្នែកមកធ្វើជាតំណាងឱ្យឈ្មោះប្រទេសទាំងមូល គឺជាទង្វើអយុត្តិធម៌បំផុតសម្រាប់ប្រជាជនកម្ពុជាដែលកំពុងខិតខំកសាងមុខមាត់ប្រទេសលើឆាកអន្តរជាតិ។
អាស្រ័យហេតុនេះ ប្រជាជនកម្ពុជាទូទាំងប្រទេស រួមទាំងបញ្ញវន្ត និងយុវជន បានរួមសាមគ្គីគ្នាជាធ្លុងមួយ ដើម្បីបដិសេធទាំងស្រុង និងថ្កោលទោសចំពោះការប្រើប្រាស់ពាក្យ "Scambodia" របស់សារព័ត៌មាន WSJ។ ប្រជាជាតិកម្ពុជាទាមទារឱ្យមានការកែតម្រូវ និងការគោរពឱ្យបានត្រឹមត្រូវចំពោះឈ្មោះផ្លូវការរបស់ប្រទេស ជាពិសេសគឺការឱ្យតម្លៃដល់សេចក្តីថ្លៃថ្នូររបស់ប្រជាពលរដ្ឋម្ចាស់ស្រុក។ កម្ពុជាគឺជាប្រទេសដែលមានអធិបតេយ្យភាព មានច្បាប់ទម្លាប់ និងមានមោទនភាពជាតិដ៏រឹងមាំ ដែលមិនអាចអនុញ្ញាតឱ្យសារព័ត៌មានណាមួយមកជាន់ឈ្លី ឬប្រើប្រាស់ពាក្យសម្តីអសុរោះដើម្បីកេងចំណេញលើការទាក់ទាញអ្នកអាន ដោយបំផ្លាញកេរ្តិ៍ឈ្មោះរបស់ជាតិសាសន៍ដទៃនោះឡើយ។
