ទីផ្សារថាមពលសកលបានជួបប្រទះនូវការប្រែប្រួលយ៉ាងគំហុកកាលពីថ្ងៃច័ន្ទ ទី៩ ខែមីនា ឆ្នាំ២០២៦ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ចេញសារព្រមានដ៏តឹងរ៉ឹងទៅកាន់ទីក្រុងតេអេរ៉ង់ ពាក់ព័ន្ធនឹងការគំរាមកំហែងដល់លំហូរប្រេងអន្តរជាតិ។ តម្លៃប្រេងឆៅដែលធ្លាប់តែហក់ឡើងលើសពី ១០០ ដុល្លារ បានត្រលប់មកដាំក្បាលចុះប្រហែល ១០% វិញភ្លាមៗ បន្ទាប់ពីមានសញ្ញាវិជ្ជមានថាជម្លោះអាចនឹងបញ្ចប់ក្នុងពេលឆាប់ៗ។ តាមរយៈសារនៅលើបណ្តាញសង្គម Truth Social លោក ដូណាល់ ត្រាំ បានព្រមានថា ប្រសិនបើអ៊ីរ៉ង់ហ៊ានធ្វើសកម្មភាពណាមួយដើម្បីរារាំងការដឹកជញ្ជូនប្រេងតាមច្រកសមុទ្រ Hormuz នោះសហរដ្ឋអាមេរិកនឹងវាយបកទៅវិញក្នុងកម្រិត "ខ្លាំងជាងមុន ២០ ដង"។ ការអត្ថាធិប្បាយនេះបានធ្វើឱ្យតម្លៃប្រេងឆៅ Brent ធ្លាក់ចុះមកត្រឹម ៨៨.៣៦ ដុល្លារក្នុងមួយបារ៉ែល ខណៈប្រេងឆៅរបស់សហរដ្ឋអាមេរិកបានធ្លាក់ចុះមកនៅត្រឹម ៨៥.១៧ ដុល្លារ។ ច្រកសមុទ្រ Hormuz ដែលស្ថិតនៅចន្លោះប្រទេសអូម៉ង់ និងអ៊ីរ៉ង់ គឺជាសរសៃឈាមសេដ្ឋកិច្ចដ៏សំខាន់បំផុត ដោយក្នុងឆ្នាំ ២០២៥ កន្លងទៅ មានបរិមាណប្រេងរហូតដល់ ១៣ លានបារ៉ែលក្នុងមួយថ្ងៃ ឬស្មើនឹង ៣១% នៃលំហូរប្រេងតាមសមុទ្រទូទាំងពិភពលោក បានឆ្លងកាត់ផ្លូវទឹកនេះ។ លោក Trump បានចាត់ទុកការធានាសន្តិសុខនៅច្រកសមុទ្រនេះថាជា "អំណោយ" ពីអាមេរិកទៅកាន់បណ្តាប្រទេសប្រើប្រាស់ប្រេងធំៗ រួមទាំងប្រទេសចិនផងដែរ។ អ្នកវិភាគមកពី Rapidan Energy Group បានលើកឡើងថា ការធ្លាក់ចុះនៃតម្លៃប្រេងនេះគឺជាលទ្ធផលនៃ "អន្តរាគមន៍តាមសម្តី" របស់ប្រធានាធិបតី ដែលបានជួយកាត់បន្ថយការភ័យខ្លាចរបស់អ្នកវិនិយោគអំពីការដាច់ចរន្តផ្គត់ផ្គង់ថាមពលយូរអង្វែង។ ទោះជាយ៉ាងណាក៏ដោយ អ្នកជំនាញខ្លះទៀតនៅតែបង្ហាញក្តីបារម្ភ និងរង់ចាំមើលប្រតិកម្មតបតពីខាងអ៊ីរ៉ង់ ក៏ដូចជាលទ្ធភាពនៃការវាយប្រហារលើហេដ្ឋារចនាសម្ព័ន្ធប្រេងក្នុងពេលខាងមុខ។ ទន្ទឹមនឹងនេះ បណ្តាប្រទេសមហាអំណាចសេដ្ឋកិច្ច G7 ក៏កំពុងរៀបចំកិច្ចប្រជុំបន្ទាន់មួយ ដើម្បីពិភាក្សាអំពីលទ្ធភាពនៃការបញ្ចេញប្រេងបម្រុងយុទ្ធសាស្ត្រចន្លោះពី ៣០០ ទៅ ៤០០ លានបារ៉ែល ដើម្បីជួយសម្រួលដល់ទីផ្សារក្នុងករណីមានការរំខានការផ្គត់ផ្គង់ដែលបណ្តាលមកពីសង្គ្រាម។ សកម្មភាពសម្របសម្រួលនេះត្រូវបានគេរំពឹងថា នឹងជួយរក្សាស្ថិរភាពតម្លៃថាមពលឱ្យនៅកម្រិតទាប ស្របតាមការគ្រោងទុករបស់រដ្ឋបាលអាមេរិក៕