របត់ទីផ្សារសកលឆ្នាំ ២០២៦ តម្លៃប្រេងឆៅហក់ឡើងខ្លាំង ស្របពេលមាសដាំក្បាលចុះយ៉ាងគំហុក

ភ្នំពេញ-ពិភពលោក៖ ទីផ្សារហិរញ្ញវត្ថុអន្តរជាតិកំពុងជួបប្រទះនូវបាតុភូតមិនធម្មតាមួយ ដែលអ្នកជំនាញសេដ្ឋកិច្ចហៅថា «ការដើរផ្ទុយគ្នានៃទ្រព្យសម្បត្តិយុទ្ធសាស្ត្រ»។ ក្នុងខណៈដែលភាពតានតឹងនៅតំបន់មជ្ឈិមបូព៌ាបានរុញច្រានតម្លៃប្រេងឆៅឱ្យហក់ឡើងខ្ពស់បំផុត ផ្ទុយទៅវិញ តម្លៃមាសដែលជាទ្រព្យសម្បត្តិសុវត្ថិភាពបំផុតសម្រាប់វិនិយោគិន បែរជាបង្ហាញសញ្ញាធ្លាក់ចុះយ៉ាងគំហុក ដែលករណីនេះបានបង្កើតជាចម្ងល់យ៉ាងខ្លាំងដល់សាធារណជន។
មូលហេតុចម្បងដែលរុញច្រានតម្លៃប្រេងឱ្យឡើងថ្លៃ គឺកើតចេញពីការរំខានដល់ខ្សែសង្វាក់ផ្គត់ផ្គង់នៅតាមច្រកសមុទ្រសំខាន់ៗ និងការវាយប្រហារលើហេដ្ឋារចនាសម្ព័ន្ធថាមពលនៅកំពង់ផែ al-Faw។ ការភ័យខ្លាចចំពោះការដាច់ចរន្តប្រេងសកល បានបង្ខំឱ្យទីផ្សារតម្លើងថ្លៃជាស្វ័យប្រវត្តិ។ ប៉ុន្តែក្នុងពេលជាមួយគ្នា បែរជាមាន ឥទ្ធិពលមួយទៀត គឺកម្លាំងនៃប្រាក់ដុល្លារអាមេរិក និងការរំពឹងទុកលើអត្រាការប្រាក់ខ្ពស់ ដែលបានក្លាយជាសម្ពាធយ៉ាងខ្លាំងរុញច្រានឱ្យតម្លៃមាសធ្លាក់ចុះ។
នៅពេលដែលសន្ទស្សន៍ប្រាក់ដុល្លារអាមេរិកមានភាពរឹងមាំ និងអត្រាការប្រាក់នៅតែរក្សាកម្រិតខ្ពស់ វិនិយោគិនភាគច្រើនបានជ្រើសរើសការលក់មាសចេញ ដើម្បីយកសាច់ប្រាក់ទៅវិនិយោគលើសញ្ញាប័ណ្ណរដ្ឋាភិបាល ឬប្រាក់បញ្ញើធនាគារដែលផ្តល់ការប្រាក់ខ្ពស់ជាង។ ស្ថានភាពនេះឆ្លុះបញ្ចាំងឱ្យឃើញថា ថ្វីត្បិតតែពិភពលោកកំពុងមានជម្លោះយោធា ប៉ុន្តែទំនុកចិត្តលើរូបិយប័ណ្ណដុល្លារនៅតែមានកម្រិតខ្ពស់ ដែលវាបានលុបបំបាត់ឥទ្ធិពលនៃ "ការភ័យខ្លាច" ដែលជាធម្មតាជួយឱ្យមាសឡើងថ្លៃ។
លើសពីនេះ បញ្ហាអតិផរណាដែលបង្កឡើងដោយការឡើងថ្លៃប្រេង ក៏កំពុងដាក់សម្ពាធឱ្យធនាគារកណ្តាលនានាពិចារណាតម្លើងអត្រាការប្រាក់បន្ថែមទៀត។ នេះគឺជាសេដ្ឋកិច្ចដ៏ស្មុគស្មាញ ដែលធ្វើឱ្យមាសបាត់បង់ភាពទាក់ទាញ បើធៀបនឹងការកាន់កាប់សាច់ប្រាក់សុទ្ធ។ អ្នកវិភាគបានព្រមានថា ប្រសិនបើតម្លៃប្រេងនៅតែបន្តកើនឡើងលើសពី ១០០ ដុល្លារក្នុងមួយបារ៉ែល នោះតម្លៃទំនិញប្រើប្រាស់នឹងហក់ឡើងខ្លាំង ដែលអាចនាំឱ្យមានការផ្លាស់ប្តូរយុទ្ធសាស្ត្រវិនិយោគសារជាថ្មីនៅលើឆាកអន្តរជាតិ៕