លោក Guterres ព្រមាន អង្គការសហប្រជាជាតិកំពុងប្រឈមនឹង ការដួលរលំហិរញ្ញវត្ថុក្នុងពេលឆាប់ៗ

ការព្រមានរបស់លោក Antonio Guterres ប្រសិនបើរដ្ឋជាសមាជិកមិនបំពេញកាតព្វកិច្ចបង់ប្រាក់ឱ្យបានទាន់ពេលវេលាទេនោះ អង្គការសហប្រជាជាតិអាចនឹង អស់សាច់ប្រាក់ក្នុងពេលខាងមុខនេះ។

💡 ប្រយោគខ្លីន័យសង្ខេប

• អគ្គលេខាធិការ UN លោក Antonio Guterres បានផ្ញើលិខិតបន្ទាន់ទៅកាន់រដ្ឋជាសមាជិកទាំងអស់ ដោយព្រមានពី ការដួលរលំហិរញ្ញវត្ថុក្នុងពេលឆាប់ៗប្រសិនបើគ្មានការដោះស្រាយបញ្ហាសាច់ប្រាក់។
• ឥទ្ធិពលពីនយោបាយអាមេរិក វិបត្តិនេះកើតឡើងចំពេលប្រធានាធិបតី ដូណាល់ ត្រាំ កាត់បន្ថយថវិកាឧបត្ថម្ភដល់ស្ថាប័នពហុភាគី និងបង្កើត ក្រុមប្រឹក្សាសន្តិភាព ដែលអ្នកជំនាញបារម្ភថាអាចនឹងមកជំនួសតួនាទីរបស់ UN។
• ការយឺតយ៉ាវក្នុងការបង់ប្រាក់ ក្នុងចំណោមសមាជិកទាំង ១៩៣ ប្រទេស មានតែ ៣៦ ប្រទេស ប៉ុណ្ណោះដែលបានបង់វិភាគទានពេញលេញសម្រាប់ឆ្នាំ ២០២៦ គិតត្រឹមចុងខែមករានេះ។

លោកអគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យរដ្ឋជាសមាជិកដោះស្រាយបញ្ហាមិនទាន់បង់ថ្លៃសមាជិកភាព និងធ្វើបដិរូបកម្មច្បាប់ហិរញ្ញវត្ថុរបស់ស្ថាប័នពិភពលោកមួយនេះឡើងវិញ។
កាលពីថ្ងៃសុក្រ តាមរយៈទីភ្នាក់ងារសារព័ត៌មាន Al Jazeera បានពិនិត្យលើលិខិតមួយដែលលោក Guterres បានផ្ញើទៅកាន់រដ្ឋជាសមាជិកទាំងអស់កាលពីដើមសប្តាហ៍នេះ ដោយព្រមានថា ស្ថាប័នសកលនេះកំពុងជួបវិបត្តិហិរញ្ញវត្ថុយ៉ាងធ្ងន់ធ្ងរ។ លិខិតនោះបានជំរុញឱ្យរដ្ឋជាសមាជិកព្រមព្រៀងគ្នាធ្វើវិសោធនកម្មច្បាប់ហិរញ្ញវត្ថុ បើមិនដូច្នោះទេ នឹងត្រូវទទួលយក លទ្ធភាពនៃការដួលរលំហិរញ្ញវត្ថុនៃអង្គការរបស់យើង។
អ្នកនាំពាក្យអង្គការសហប្រជាជាតិ លោក Farhan Haq បានប្រាប់អ្នកយកព័ត៌មានកាលពីរសៀលថ្ងៃសុក្រថា ចំពោះការបង់ប្រាក់គឺឥឡូវនេះ គ្មានពេលទៀតឡើយ។ លោកបានបន្ថែមថា អង្គការសហប្រជាជាតិលែងមានទុនបម្រុងសាច់ប្រាក់សម្រាប់បន្តដំណើរការដូចឆ្នាំមុនៗទៀតហើយ។
លោក Guterres មិនបានបញ្ចេញឈ្មោះប្រទេសជាក់លាក់ណាមួយក៏ដោយ ប៉ុន្តែការអំពាវនាវនេះធ្វើឡើងចំពេលដែលប្រធានាធិបតីសហរដ្ឋអាមេរិក លោក Donald Trump បានកាត់បន្ថយថវិកាដែលវ៉ាស៊ីនតោនផ្តល់ឱ្យស្ថាប័នពហុភាគីនានា។ រដ្ឋបាលលោក Trump ក៏បានប្រកាសពីផែនការដកខ្លួនចេញពីភ្នាក់ងារអង្គការសហប្រជាជាតិមួយចំនួន និងបានបង្កើតគំនិតផ្តួចផ្តើម ក្រុមប្រឹក្សាសន្តិភាព ដែលអ្នកជំនាញយល់ថាមានបំណងបង្អាក់តួនាទីរបស់អង្គការសហប្រជាជាតិ។

• ចំណែក់ប្រាក់ សហរដ្ឋអាមេរិកទទួលបន្ទុក ២២% នៃថវិកាស្នូល តាមពីក្រោយដោយប្រទេសចិន ២០%។
• បំណុលដែលមិនទាន់បង់ គិតត្រឹមចុងឆ្នាំ ២០២៥ មានប្រាក់ជំពាក់ក្នុងកម្រិតកំណត់ត្រារហូតដល់ ១,៥៧ ពាន់លានដុល្លារ។
• ការបង់ប្រាក់ក្នុងឆ្នាំ ២០២៦ ក្នុងចំណោមរដ្ឋជាសមាជិក ១៩៣ មានតែ ៣៦ ប្រទេស ប៉ុណ្ណោះដែលបានបង់ប្រាក់វិភាគទានពេញលេញសម្រាប់ឆ្នាំ ២០២៦ គិតត្រឹមថ្ងៃព្រហស្បតិ៍សប្តាហ៍នេះ។
• ការកាត់បន្ថយថវិកា៖ អង្គការសហប្រជាជាតិបានអនុម័តកញ្ចប់ថវិកាចំនួន ៣,៤៥ ពាន់លានដុល្លារសម្រាប់ឆ្នាំ ២០២៦ ដែលបានកាត់បន្ថយ ៧% ធៀបនឹងឆ្នាំមុន ដើម្បីកាត់បន្ថយការចំណាយ។

លោក Guterres បានព្រមានថា ប្រសិនបើរដ្ឋជាសមាជិកមិនបំពេញកាតព្វកិច្ចបង់ប្រាក់ឱ្យបានទាន់ពេលវេលាទេនោះ អង្គការសហប្រជាជាតិអាចនឹង អស់សាច់ប្រាក់ត្រឹមខែកក្កដា។ លោកក៏បានរិះគន់ច្បាប់ចាស់គំរិលដែលតម្រូវឱ្យស្ថាប័ននេះបង្វិលសាច់ប្រាក់ដែលសល់ពីការចំណាយទៅឱ្យរដ្ឋសមាជិកវិញជារៀងរាល់ឆ្នាំថាជា វដ្តដ៏រញ៉េរញ៉ៃ (Kafkaesque cycle) ព្រោះស្ថាប័ននេះត្រូវសងសាច់ប្រាក់ដែលខ្លួនមិនមាននៅក្នុងដៃ។ដស