បន្ទាន់! មជ្ឈិមបូព៌ាឆាបឆេះខ្លាំង បន្ទាប់ពីអាមេរិក និងអ៊ីស្រាអែល បើកការវាយប្រហារទ្រង់ទ្រាយធំលើអ៊ីរ៉ង់

ស៊ិនហួ៖ ពិភពលោកកំពុងតាមដានដោយក្តីបារម្ភជាទីបំផុត ខណៈដែលមជ្ឈិមបូព៌ាបានធ្លាក់ចូលទៅក្នុងវង់នៃសង្គ្រាមថ្មីមួយ បន្ទាប់ពីសហរដ្ឋអាមេរិក និងអ៊ីស្រាអែលបានចាប់ផ្តើម "ប្រតិបត្តិការប្រយុទ្ធកម្រិតធ្ងន់" ប្រឆាំងនឹងប្រទេសអ៊ីរ៉ង់ កាលពីថ្ងៃសៅរ៍កន្លងទៅនេះ។ ការវាយប្រហារនេះបានបង្កឱ្យមានការសងសឹកភ្លាមៗពីសំណាក់ទីក្រុងតេហេរ៉ង់ ដែលបណ្តាលឱ្យមានការផ្ទុះឡើងនៅតាមបណ្តាប្រទេសជាច្រើន រួមមានបារ៉ែន កាតា គុយវ៉ែត ហ្សកដានី អារ៉ាប់រួម និងអារ៉ាប៊ីសាអូឌីត។ ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសថា គោលបំណងនៃប្រតិបត្តិការនេះគឺ "ដើម្បីការពារប្រជាជនអាមេរិក ដោយកម្ចាត់ការគំរាមកំហែងដែលជិតមកដល់" ពីអ៊ីរ៉ង់។ ស្របពេលជាមួយគ្នានេះ ក្រសួងការពារជាតិអ៊ីស្រាអែលបានអះអាងថា ខ្លួនបានបើកការវាយប្រហារ "បង្ការទុកមុន" ដើម្បីលុបបំបាត់រាល់ការគំរាមកំហែងដែលប៉ះពាល់ដល់សន្តិសុខជាតិរបស់ខ្លួន។ នៅក្នុងទីក្រុងតេហេរ៉ង់ គ្រាប់មីស៊ីលបានធ្លាក់ចំតំបន់ក្បែរការិយាល័យរបស់មេដឹកនាំកំពូលអ៊ីរ៉ង់ លោក Ali Khamenei និងប្រធានាធិបតី Masoud Pezeshkian ប៉ុន្តែប្រភពពីអ៊ីរ៉ង់បានបញ្ជាក់ថា មេដឹកនាំទាំងពីរមិនមានរងគ្រោះថ្នាក់អ្វីឡើយ។ ទោះជាយ៉ាងណាក៏ដោយ យោងតាមទីភ្នាក់ងារសារព័ត៌មានរដ្ឋ IRNA ការវាយប្រហារតាមអាកាសរបស់អាមេរិក-អ៊ីស្រាអែល បានធ្លាក់ចំសាលារៀនកុមារីមួយកន្លែងនៅភាគខាងត្បូងអ៊ីរ៉ង់ បណ្តាលឱ្យសិស្សយ៉ាងហោចណាស់ ៥៧ នាក់បានបាត់បង់ជីវិត។ ជាការឆ្លើយតបទៅនឹងអ្វីដែលខ្លួនហៅថាជា "ការឈ្លានពានរបស់សត្រូវដ៏ឃោរឃៅ" កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានចាប់ផ្តើមការវាយប្រហារដោយមីស៊ីល និងដ្រូនទ្រង់ទ្រាយធំសំដៅទៅរកអ៊ីស្រាអែល។ កងកម្លាំងប្រដាប់អាវុធអ៊ីរ៉ង់បានព្រមានថា រាល់មូលដ្ឋានយោធាអាមេរិកទាំងអស់នៅក្នុងតំបន់ គឺជាគោលដៅស្របច្បាប់សម្រាប់ការវាយប្រហារ។ យោងតាមទីភ្នាក់ងារសារព័ត៌មាន Fars ទីក្រុងតេហេរ៉ង់បានវាយប្រហារលើទីតាំងយោធានៅក្នុងបណ្តាប្រទេសឈូងសមុទ្រអារ៉ាប់ដែលផ្តល់ទីតាំងឱ្យទ័ពអាមេរិក រួមមានមូលដ្ឋានទ័ពអាកាស Al Udeid ក្នុងប្រទេសកាតា និងទីបញ្ជាការកងនាវាទី ៥ របស់អាមេរិកក្នុងប្រទេសបារ៉ែន។ ស្ថានភាពដ៏តានតឹងនេះបានបង្ខំឱ្យប្រទេសជាច្រើនសម្រេចចិត្តបិទដែនអាកាសទាំងស្រុង ឬមួយផ្នែក ហើយបណ្តាក្រុមហ៊ុនអាកាសចរណ៍អន្តរជាតិជាច្រើនបានសម្រេចលុបចោលជើងហោះហើរទៅកាន់តំបន់មជ្ឈិមបូព៌ាជាបន្ទាន់។ ការផ្ទុះអាវុធនេះបានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីសហរដ្ឋអាមេរិក និងអ៊ីរ៉ង់ទើបតែបានបញ្ចប់ការចរចាដោយប្រយោលជុំទីបី និងបានព្រមព្រៀងគ្នាបន្តកិច្ចពិភាក្សានៅសប្តាហ៍ក្រោយ។ ព្រឹត្តិការណ៍នេះត្រូវបានគេមើលឃើញថាមានភាពស្រដៀងគ្នាទៅនឹងហេតុការណ៍កាលពីខែមិថុនាឆ្នាំមុន នៅពេលដែលអ៊ីស្រាអែលបានវាយប្រហារអ៊ីរ៉ង់ដោយមិនឱ្យដឹងខ្លួនចំពេលកំពុងមានការចរចា ដែលបង្កឱ្យមាន "សង្គ្រាម ១២ ថ្ងៃ" និងការទម្លាក់គ្រាប់បែកលើទីតាំងនុយក្លេអ៊ែរសំខាន់ៗរបស់អ៊ីរ៉ង់ដោយសហរដ្ឋអាមេរិក៕