ក្រុមហ៊ុន Changan សម្រេចបានសមិទ្ធផលផលិតរថយន្តគ្រប់ ៣០ លានគ្រឿង ជាមួយកំណត់ត្រាល្បឿនលឿនបំផុត

រចនាសម្ព័ន្ធថ្មីក្នុងឆ្នាំ ២០២៥ Changan បានក្លាយជាក្បាលម៉ាស៊ីនឧស្សាហកម្មរថយន្តរដ្ឋដ៏ធំមួយក្នុងចំណោមក្រុមហ៊ុនយក្សទាំង ៣ របស់ប្រទេសចិន

💡 ប្រយោគខ្លីន័យសង្ខេប

ជាប្រវត្តិសាស្ត្រ ក្រុមហ៊ុន Changan សម្រេចបានការផលិតរថយន្តសរុបចំនួន ៣០ លានគ្រឿង ជាផ្លូវការ។
ផលិតកម្មគួរឱ្យភ្ញាក់ផ្អើល ក្រុមហ៊ុនចំណាយពេលត្រឹមតែជាង ៤ ឆ្នាំប៉ុណ្ណោះ ដើម្បីផលិតបាន ១០ លានគ្រឿងចុងក្រោយ (ពី ២០ លាន ទៅ ៣០ លានគ្រឿង) ដែលជាល្បឿនលឿនបំផុតក្នុងប្រវត្តិសាស្ត្រក្រុមហ៊ុន។
មជ្ឈមណ្ឌលផលិតកម្ម ការសម្រេចបាននេះកើតឡើងនៅរោងចក្រឆ្លាតវៃ Avatr Smart Factory ក្នុងក្រុង Chongqing ភាគនិរតីនៃប្រទេសចិន

ក្រុមហ៊ុនបុត្រសម្ព័ន្ធចិន China Changan Automobile Group Co., Ltd. បានប្រកាសជាផ្លូវការកាលពីថ្ងៃពុធថា ខ្លួនសម្រេចបាននូវការផលិតរថយន្តគ្រប់ចំនួន ៣០ លានគ្រឿង ដែលនេះជាកំណត់ត្រាថ្មីមួយ បន្ទាប់ពីចំណាយពេលត្រឹមតែជាង ៤ ឆ្នាំប៉ុណ្ណោះ ក្រោយពេលសម្រេចបានចំនួន ២០ លានគ្រឿងនាពេលកន្លងទៅ។ រថយន្តទី ៣០ លានដែលបានចាកចេញពីខ្សែសង្វាក់ផលិតកម្ម គឺជាប្រភេទរថយន្តទំនើប Avatr 12 sedan ដែលផលិតនៅរោងចក្រឆ្លាតវៃ Avatr Smart Factory ស្ថិតក្នុងក្រុង Chongqing ភាគនិរតីនៃប្រទេសចិន។ សូមបញ្ជាក់ថា Avatr គឺជាម៉ាករថយន្តអគ្គិសនីកម្រិតខ្ពស់ (Premium EV) ស្ថិតក្រោមការគ្រប់គ្រងរបស់ក្រុមហ៊ុន Changan។ លោក Zhu Huarong ប្រធានក្រុមហ៊ុន Changan បានគូសបញ្ជាក់ពីសន្ទុះនៃការរីកចម្រើនយ៉ាងលឿនរបស់ក្រុមហ៊ុនតាមរយៈតួលេខប្រវត្តិសាស្ត្រដូចខាងក្រោម៖

១០ លានគ្រឿងដំបូង ចំណាយពេលរហូតដល់ ៣០ ឆ្នាំ។
២០ លានគ្រឿង ចំណាយពេលបន្ថែម ៧ ឆ្នាំ។
៣០ លានគ្រឿង (បច្ចុប្បន្ន)៖ ចំណាយពេលត្រឹមតែជាង ៤ ឆ្នាំ ប៉ុណ្ណោះ។

លោក Zhu បានលើកឡើងថា ការលោតផ្លោះយ៉ាងរហ័សនេះ គឺឆ្លុះបញ្ចាំងពីសន្ទុះដ៏រឹងមាំនៃការច្នៃប្រឌិតដោយឯករាជ្យ និងការអភិវឌ្ឍទ្រង់ទ្រាយធំនៅក្នុងឧស្សាហកម្មយានយន្តរបស់ប្រទេសចិន។ China Changan Automobile Group ដែលត្រូវបានបង្កើតឡើងវិញតាមរយៈការធ្វើរចនាសម្ព័ន្ធថ្មីកាលពីថ្ងៃទី ២៩ ខែកក្កដា ឆ្នាំ ២០២៥ បច្ចុប្បន្នគឺជាក្រុមហ៊ុមរដ្ឋដ៏ធំមួយក្នុងចំណោមក្រុមហ៊ុនយានយន្តរដ្ឋធំៗទាំង ៣ របស់ចិន។ ក្រុមហ៊ុនកំពុងតែបោះជំហានយ៉ាងសកម្មក្នុងការផ្លាស់ប្តូរខ្លួនទៅជាសហគ្រាសបច្ចេកវិទ្យាដែលផ្តោតលើ៖

១. Electrification (ការប្រើប្រាស់ថាមពលអគ្គិសនី)
២. Connectivity (ការភ្ជាប់ទំនាក់ទំនងបច្ចេកវិទ្យា)
៣. Intelligence (ប្រព័ន្ធបញ្ញាសិប្បនិម្មិតឆ្លាតវៃ)

សមិទ្ធផលនេះមិនត្រឹមតែបង្ហាញពីភាពជោគជ័យរបស់ Changan ប៉ុណ្ណោះទេ ប៉ុន្តែវាក៏ជាសញ្ញាបង្ហាញពីការឈានមុខគេរបស់ប្រទេសចិននៅក្នុងទីផ្សារយានយន្តអគ្គិសនីសកលផងដែរ។

-15%