វិបត្តិសង្គ្រាមមជ្ឈិមបូព៌ា និងឥទ្ធិពលលើសេដ្ឋកិច្ចសកល

ភ្នំពេញ-មជ្ឈិមបូព៌ា៖ ពិភពលោកកំពុងស្ថិតក្នុងសភាពដកដង្ហើមមិនដល់ពោះ ខណៈដែលជម្លោះរវាងអ៊ីស្រាអែល និងអ៊ីរ៉ង់ បានឈានហួសពីការប្រកួតប្រជែងឥទ្ធិពលក្នុងតំបន់ ទៅជាការគំរាមកំហែងដល់សន្តិសុខ និងសេដ្ឋកិច្ចសកលទាំងមូល។ ការវិភាគស៊ីជម្រៅបានបង្ហាញថា សង្រ្គាមនេះអាចនឹងក្លាយជា «សេណារីយ៉ូថ្ងៃអវសាន» (Doomsday Scenario) ប្រសិនបើវាឈានដល់ចំណុចដែលអ៊ីរ៉ង់សម្រេចចិត្តវាយកម្ទេចបណ្តាប្រទេសក្នុងក្រុមប្រឹក្សាសហប្រតិបត្តិការឈូងសមុទ្រ (GCC) ដូចជា អារ៉ាប៊ីសាអ៊ូឌីត អេមីរ៉ាត និងកាតាជាដើម។
ប្រសិនបើហេដ្ឋារចនាសម្ព័ន្ធថាមពលក្នុងតំបន់ GCC ត្រូវបានបំផ្លាញ ពិភពលោកនឹងជួបប្រទះនូវមហន្តរាយសេដ្ឋកិច្ចដែលមិនធ្លាប់មាន ដោយតម្លៃប្រេងអាចហក់ឡើងដល់ ២០០ ឬ ៣០០ ដុល្លារក្នុងមួយបារ៉ែល។ ការបិទច្រកសមុទ្រ Hormuz នឹងកាត់ផ្តាច់សរសៃឈាមសេដ្ឋកិច្ចសកល ដែលនាំឱ្យកើតមានអតិផរណាធ្ងន់ធ្ងរ និងវិបត្តិសេដ្ឋកិច្ចពិភពលោកដ៏ជ្រៅបំផុត។ លើសពីនេះ វានឹងរុញច្រានឱ្យមានសង្រ្គាមលោកលើកទី៣ ខណៈដែលមហាអំណាចដូចជាសហរដ្ឋអាមេរិក ចិន និងរុស្ស៊ី មិនអាចឈរមើលផលប្រយោជន៍ថាមពលរបស់ពួកគេត្រូវរលាយជាផេះផង់នោះឡើយ។
ក្នុងស្ថានភាពដ៏ស្រួចស្រាវនេះ យុទ្ធសាស្ត្ររបស់អ៊ីរ៉ង់ចំពោះប្រទេសសម្ព័ន្ធមិត្តរបស់អ៊ីស្រាអែល ក៏បានក្លាយជាចំណុចគួរឱ្យព្រួយបារម្ភ ពិសេសចំពោះប្រទេសក្នុងតំបន់អាស៊ីដូចជាប្រទេសថៃ។ ថៃត្រូវបានគេមើលឃើញថាស្ថិតក្នុងស្ថានភាព «រអាមាត់អំបិល» ខណៈដែលម្ខាងចង់បានប្រាក់ចំណេញពីការធ្វើជាឈ្មួញកណ្តាល ឬផលិតគ្រឿងបន្លាស់អាវុធឱ្យអ៊ីស្រាអែល ប៉ុន្តែម្ខាងទៀតបែរជាពឹងផ្អែកស្ទើរទាំងស្រុងលើថាមពលពីមជ្ឈិមបូព៌ា។ អ៊ីរ៉ង់អាចនឹងប្រើប្រាស់យុទ្ធសាស្ត្រ «សង្គ្រាមកាត់ផ្តាច់» តាមរយៈការដាក់បញ្ជីខ្មៅ ឬរារាំងកប៉ាល់ដឹកប្រេងដែលធ្វើដំណើរទៅកាន់ប្រទេសថៃ ដែលនឹងធ្វើឱ្យសេដ្ឋកិច្ចថៃដួលរំលំភ្លាមៗ។
សំណួរដែលអ្នកវិភាគកំពុងសួរនោះគឺថា តើការបង្កសង្គ្រាមរបស់អ៊ីស្រាអែលគឺជាភាពឆ្លាតវៃដែរឬទេ? តាមទស្សនៈយុទ្ធសាស្ត្រ នេះហាក់ដូចជាការបរាជ័យលើសមរភូមិការទូត។ នៅពេលសង្រ្គាមបណ្តាលឱ្យមានវិបត្តិថាមពលសកល អ៊ីស្រាអែលនឹងក្លាយជា «ដើមចម» នៃទុក្ខវេទនារបស់មនុស្សជាតិ ដែលបង្កឱ្យមានរលកស្អប់ខ្ពើមពីមហាជនទូទាំងពិភពលោក និងសម្ពាធនយោបាយពីបណ្តាប្រទេសដែលរងគ្រោះសេដ្ឋកិច្ច។ អ៊ីស្រាអែលអាចនឹងឈ្នះយោធាបណ្តោះអាសន្ន ប៉ុន្តែនឹងក្លាយជាប្រទេសឯកោបំផុតនៅលើលោក (Pariah State) ដោយសារតែការបំផ្លាញ «ឆ្នាំងបាយ» ពិភពលោក។
ជាសេចក្តីសន្និដ្ឋាន យុទ្ធសាស្ត្រព្យាយាមកម្ទេចអ៊ីរ៉ង់ដោយមិនខ្វល់ពីផលប៉ះពាល់សកល គឺជាការដុតផ្ទះខ្លួនឯងដើម្បីកម្ទេចសត្រូវ។ សម្រាប់ប្រទេសដូចជាថៃ និងសម្ព័ន្ធមិត្តដទៃទៀត ការបន្តជួយជ្រោមជ្រែងយោធាដល់អ៊ីស្រាអែលក្នុងកាលៈទេសៈនេះ គឺជាហានិភ័យដ៏ខ្ពស់បំផុត។ នៅទីបំផុត ទោះបីជាមានឥទ្ធិពលស្រមោលលើអាមេរិកយ៉ាងណាក៏ដោយ ក៏អ៊ីស្រាអែលមិនអាចរស់នៅដោយសុខសាន្តក្នុងពិភពលោកដែលកំពុងឆេះខ្លោច និងដួលរំលំដោយសារតែមហិច្ឆតាពង្រីកទឹកដីរបស់ខ្លួននោះដែរ៕