ក្តីរំភើបឥតឧបមាដែលវីរកងទ័ព ១៨ រូប ទទួលបានសេរីភាព​ និវត្តន៍មកកាន់មាតុប្រទេសវិញ

បន្ទាប់ពីបានឆ្លងកាត់ការលំបាក និងការបំបែកបំបាក់ដោយសារជម្លោះព្រំដែន ថ្ងៃនេះគឺជាថ្ងៃមហានក្ខត្តឫក្សដែលប្រជាជាតិខ្មែរទាំងមូល បានឃើញនូវស្នាមញញឹម និងការជួបជុំគ្នាឡើងវិញ។ ការដោះលែងវីរកងទ័ពកម្ពុជាទាំង ១៨ រូប ពីការឃុំឃាំងរបស់ភាគីសៀម មិនត្រឹមតែជាជ័យជម្នះនៃកិច្ចការការទូតប៉ុណ្ណោះទេ ប៉ុន្តែវាគឺជាការវិលត្រឡប់នៃ វីរភាពនៃកងទ័ពការពារជាតិ មកកាន់មាតុភូមិវិញ។

រូបភាពនៃការឱបក្រសោបរវាងវីរកងទ័ព និងក្រុមគ្រួសារ គឺជាទិដ្ឋភាពដែលរំជួលចិត្តបំផុត។ ទឹកភ្នែកដែលស្រក់មកនៅពេលនេះ មិនមែនជាទឹកភ្នែកនៃសេចក្តីទុក្ខឡើយ ប៉ុន្តែជាទឹកភ្នែកនៃក្តីត្រេកអរ ដែលត្រូវជាស្វាមី ជាឪពុក និងកូនប្រុសដ៏ក្លាហាន បានវិលមកជួបជុំគ្រួសារ និងមាតុភូមិជាទីស្រឡាញ់វិញ បន្ទាប់ពីបានលះបង់សេរីភាពដើម្បីការពារបូរណភាពទឹកដី។
វីរកងទ័ពទាំង ១៨ រូប បានបង្ហាញឱ្យពិភពលោកឃើញពីស្មារតីអង់អាចក្លាហានរបស់កងយោធពលខេមរភូមិន្ទ។ ទោះបីស្ថិតក្នុងស្ថានភាពលំបាក ឬការឃុំឃាំងយ៉ាងណាក៏ដោយ ក៏ស្មារតីស្នេហាជាតិ និងភក្ដីភាពចំពោះជាតិសាសន៍ មិនត្រូវបានរង្គោះរង្គើឡើយ។ ពួកគេគឺជាវីរកងទ័ពដ៏ហានក្លា ដែលបានឈរការពារទឹកដីដោយមិនរាថយ។

ការដោះលែងនេះ ក៏បានឆ្លុះបញ្ចាំងពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា តាមរយៈយន្តការការទូត និងកិច្ចសហប្រតិបត្តិការយោធា។ វាគឺជាសក្ខីភាពដែលបង្ហាញថា រដ្ឋាភិបាលកម្ពុជាតែងតែយកចិត្តទុកដាក់ និងមិនបោះបង់ចោលកូនចៅខ្លួនឯងដែលកំពុងបំពេញបេសកកម្មដើម្បីជាតិឡើយ។

ព្រឹត្តិការណ៍នេះ បានដាស់ស្មារតីសាមគ្គីភាពទូទាំងប្រទេស។ ប្រជាជនខ្មែរគ្រប់មជ្ឈដ្ឋានបានសម្តែងនូវការអបអរសាទរ និងការគោរពដឹងគុណចំពោះវីរកងទ័ពទាំង ១៨ រូប។ សន្តិភាព និងសេរីភាពដែលពួកគេទទួលបាននៅថ្ងៃនេះ គឺជាក្តីសង្ឃឹមថ្មីសម្រាប់ទំនាក់ទំនងតាមព្រំដែន ដែលយើងចង់ឃើញនូវការរីកចម្រើន និងសន្តិសុខជាជាងការប្រឈមមុខដាក់គ្នា។

យើងសូមលំឱនកាយគោរពដល់ដួងវិញ្ញាណក្ខន្ធកងទ័ពដែលបានពលីក្នុងសមរភូមិ នឹងវីរភាពរបស់វីរកងទ័ពទាំង ១៨ រូបដែលបានធ្វើមាតុភូមិនិវត្តន៍

សូមអុគុណនឹងអបអរសាទរចំពោះគ្រួសារសាច់ញាតិដែលបានជួបជុំគ្នាវិញ។ អ្នកទាំងអស់គ្នាគឺជាមោទនភាពរបស់ជាតិ ហើយមាតុភូមិកម្ពុជានឹងចងចាំនូវការលះបង់របស់អ្នកជានិច្ច។