យោងតាមការដកស្រង់ពីកាសែតល្បីឈ្មោះរបស់ថៃ The Nation Thailand ផលិតផលរបស់ប្រទេសថៃកំពុងប្រឈមមុខនឹងសម្ពាធយ៉ាងខ្លាំង ហើយបានបាត់បង់ចំណែកទីផ្សារយ៉ាងគំហុកនៅក្នុងប្រទេសកម្ពុជា និងបណ្តាប្រទេសដទៃទៀតនៅអាស៊ីអាគ្នេយ៍។ កាសែតនេះបានអំពាវនាវឱ្យរដ្ឋាភិបាល និងវិស័យឯកជនថៃពិចារណាឡើងវិញនូវយុទ្ធសាស្ត្រពាណិជ្ជកម្មរបស់ពួកគេ។
កម្ពុជាធ្លាប់ជាទីផ្សារនាំចេញដ៏សំខាន់ និងមានស្ថិរភាពបំផុតមួយសម្រាប់ផលិតផលថៃ (ជាពិសេស ទំនិញប្រើប្រាស់ប្រចាំថ្ងៃ គ្រឿងសម្អាង និងភេសជ្ជៈ)។ ប៉ុន្តែស្ថានភាពបានផ្លាស់ប្តូរយ៉ាងលឿនដោយសារភាពតានតឹងជម្លោះព្រំដែនថៃនិងកម្ពុជា។
ការនាំចូលពីប្រទេសជិតខាងដូចជា វៀតណាម និង ចិន បានកើនឡើងយ៉ាងលឿន។ វៀតណាមទទួលបានប្រៀបដោយសារថ្លៃដឹកជញ្ជូនទាប និងតម្លៃលក់ទាបជាង ខណៈផលិតផលចិនមានជម្រើសច្រើន និងមានតម្លៃសមរម្យ។
រីឯកម្ពុជាខ្លួនឯងក៏មានការផលិតក្នុងស្រុកកាន់តែរឹងមាំ ដែលផ្តល់ជម្រើសដល់អ្នកប្រើប្រាស់កម្ពុជាកាន់តែច្រើន។ អ្នកប្រើប្រាស់កម្ពុជានាពេលបច្ចុប្បន្នមានទំនោរទៅរកម៉ាកយីហោផ្សេងៗទៀតក្រៅពីថៃ និងស្វែងរកផលិតផលដែលមានតម្លៃសមរម្យបំផុត ជាជាងភាពស្មោះត្រង់ដាច់ខាតចំពោះម៉ាកថៃ។
ហេតុសំខាន់ៗមួយចំនួនដែលធ្វើឱ្យផលិតផលថៃថមថយប្រជាប្រិយភាព

1. ដោយសារការកើនឡើងថ្លៃពលកម្ម និងការដឹកជញ្ជូននៅប្រទេសថៃ តម្លៃលក់ចុងក្រោយនៃទំនិញថៃបានថ្លៃជាងគូប្រជែង។
2. ក្រុមហ៊ុនជាច្រើនក្នុងស្រុកកំពុងជាប់គាំងការនាំចេញមកកាន់ទីផ្សារកម្ពុជាដោយសារការបិទច្រកព្រំដែនឯកតោភាគីខាងយោធាថៃ ។
3. ភាពរអាក់រអួលនៃខ្សែសង្វាក់ផ្គត់ផ្គង់សកលនិងគ្រោះធម្មជាតិក្នុងប្រទេសថៃបានធ្វើឱ្យប្រទេសជិតខាងអាចពង្រឹងទីផ្សាររបស់ខ្លួនបានយ៉ាងឆាប់រហ័ស។

ដើម្បីទប់ស្កាត់ការធ្លាក់ចុះនេះ រដ្ឋាភិបាល និងក្រុមហ៊ុនថៃត្រូវបានជំរុញឱ្យ ងាកមកផ្តោតលើផលិតផលពិសេស (Premium Goods) ដែលមានស្តង់ដារគុណភាពខ្ពស់ដែលពិបាកប្រកួតប្រជែង ជាពិសេសការស្តារឡើងវិញនូវទំនាក់ទំនងល្អជាមួយនិងប្រទេសជិតខាង។