Blpost

ក្រុមហ៊ុនអាកាសចរណ៍ជាតិទួរគី Turkish Airlines បានប្រកាសជាផ្លូវការអំពីការចាប់ផ្តើមប្រតិបត្តិការ ជើងហោះហើរត្រង់ (Direct Flights) ពីទីក្រុង អ៊ីស្តង់ប៊ុល (Istanbul) ប្រទេសតួកគី មកកាន់រាជធានីភ្នំពេញ ប្រទេសកម្ពុជា ចាប់ពីថ្ងៃទី ១១ ខែធ្នូ ឆ្នាំ ២០២៥ តទៅ។
ឯកឧត្តម ស៊ិន ចាន់សេរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល (SSCA) បានបញ្ជាក់ពីការបន្ថែមជើងហោះហើរនេះ ដោយចាត់ទុកថាជាសមិទ្ធផលថ្មីមួយទៀត ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងកិច្ចខិតខំប្រឹងប្រែងរបស់ SSCA និងក្រសួងទេសចរណ៍។ ជើងហោះហើរត្រង់ថ្មីនេះ ត្រូវបានគេមើលឃើញថា នឹងជួយពង្រឹងការតភ្ជាប់យ៉ាងងាយស្រួលរវាងកម្ពុជា និងទ្វីបអឺរ៉ុប តាមរយៈទីក្រុងអ៊ីស្តង់ប៊ុល ដែលជា ចំណុចតភ្ជាប់អន្តរជាតិដ៏សំខាន់ (Major Hub) របស់ Turkish Airlines ទៅកាន់គោលដៅជាង ៣៥០ កន្លែង នៅក្នុង ១៣០ ប្រទេសទូទាំងពិភពលោក។
ការសម្រេចចិត្តបើកជើងហោះហើរត្រង់នេះ ឆ្លុះបញ្ចាំងពី ទំនុកចិត្តដែលកំពុងកើនឡើង ទៅលើវិស័យអាកាសចរណ៍កម្ពុជា ជាពិសេសដោយសារតែវត្តមាននៃ អាកាសយានដ្ឋានអន្តរជាតិតេជោ (Techo International Airport - KTI) ដែលជាសមិទ្ធផលដ៏ធំរបស់រាជរដ្ឋាភិបាល។
ការតភ្ជាប់ដោយផ្ទាល់នេះត្រូវបានរំពឹងថានឹងជួយ បង្កើនលំហូរអ្នកដំណើរអន្តរជាតិ និងភ្ញៀវទេសចរ មកកាន់កម្ពុជា ទាំងភ្ញៀវទេសចរណ៍ពីតួកគី និងភ្ញៀវមកពីបណ្តាប្រទេសអឺរ៉ុប ដែលនឹងមកទស្សនាសម្បត្តិវប្បធម៌ និងប្រវត្តិសាស្ត្រល្បីៗរបស់កម្ពុជា។ ជើងហោះហើរត្រង់ពីអ៊ីស្តង់ប៊ុល មកកាន់រាជធានីភ្នំពេញ ត្រូវបានកំណត់នឹងចាប់ផ្តើមដំណើរការនៅថ្ងៃទី ១១ ខែធ្នូ ឆ្នាំ ២០២៥ នេះតទៅ។